क्यानबेरामा पहिलो पटक भएको नेपाल फेष्टिवल भब्य रुपमा सम्पन्न भएको छ । क्यानबेराको सिटि गरिमा प्लेसबाट सुरु भएको परेडमा नेपाली झण्डा सहित बिभिन्न जातजातीको पोशाक, कुमारी रथ यात्रा पंन्चे बाजामा नाचगान सहितको परेडले नेपाल र नेपालीको शान, मान र गौरवको अनुभुती गरेको थियो । परेड गरिमा प्लेसबाट ११ः३० मा सुरुवात भएर कमनवेल्थ पार्कको स्टेज ८८ मा आएर टुंगीएको थियो । परेडको अन्त्यपछि स्टेजमा कुमारी सहित सनातन समाजको समूहबाट स्वस्तिपाठबाट कार्यक्रम सुरु भएको थियो । स्वस्तिपाठमा धार्मिक प्रवचनकर्ता व्यासाचार्य श्री भुवन गुरुदेव पनि रहनुभएको थियो ।
औपचारीक कार्यक्रममा एनआरएनए अष्ट्रेलियाका अध्यक्ष नन्द गुरुगं, महासचिव राजु अधिकारी उपाध्यक्षहरु अशोक बस्नेत, देव गुरुंग, हरि खड्का र बिनोद आचार्य सहित सचिव सन्ध्या शाह, कोषाध्यक्ष अनिल पोखरेल र यूथ कोअर्डीनेटर रविन मिश्र र डेपुटि यूथ कोअर्डीनेटर चन्द्र तिवारीको उपस्थिति रहेको थियो । उहॉंहरु संगै अन्य एनआरएनए प्रतिनिधिहरु, बिदेशी कुटनितिक नियोगका प्रतिनिधिहरु, सामाजिक संघ संस्थाका प्रतिनिधि सहित बिभिन्न ब्यक्तिहरुको उपस्थिति रहेको थियो ।
कार्यक्रममा सिस्नोपानी नेपालका महासचिव टंक आचार्य सिड्नीबाट यहि कार्यक्रम हेर्न आउनु भएको रहेछ । उहॉंले यो रमाइलो हेर्न पॉंउदा निक्कै खुसी लागेको बताउदै उहॉंले गोदावरी र दक्षिणकाली पुगे जस्तो महसुस रहेको बताउनुभयो । हाम्रो टोपि बिशेष दौरा सुरुवाल बिशेष अनि समुन्द्र तरेपनि आफनो आफनै लाग्ने भनेर भावुक हुदै सानो ठॉंउमा यति ठुलो कार्यक्रम लोभ लाग्दो रहेको र बुवाआमाहरु खुसी भएको देख्दा आफु खुसी भएको बताउनुभएको थियो ।
नेपाल हाउसको अवलोकन सकेपछि क्यानबेराका स्थायी बासीन्दा डेभिडलाइ कस्तो लाग्यो भनेर सोधेका थियौं । नेपालको यो अनेक कुराहरु हेर्दा एकपटक नेपाल घुम्न जॉंउ जॉंउ भएको छ सायद म मेरो परिवार सहित जान्छु होला भन्दा परिवार छेउमै बसेर मुसुमुसु हॉंसिरहेको देखेका थियौं । डेभिडलाइ हाम्रो पोशाक, खानेकुरा र नेपालीहरु एकजुट भएको असाध्यै मन पर्यो अरे । फेष्टिवलमा नेपाल हाउसमा नेपालका घरमा प्रयोग हुने सर सामाग्रीहरु राखिएको थियो र छेउमा धरहरा उभीएको थियो ।
क्यानबेराको कमनबेल्थ पार्क भरिभराउ नेपाली देख्दा सबैको मन खुसी देखिन्थ्यो । जता हेर्यो उतै नेपाली जता हेर्यो उतै आफना । सायद यस्तै कार्यक्रमले हो नेपाललाइ भावनात्मक रुपमा जोड्ने । कार्यक्रम वरपर नेपाली ब्यसायीक घरानाहरुका स्टल थिए भने नेपाली खानाको स्टलहरु खाना बेच्न भ्याइ नभ्याइ थिए । कार्यक्रममा स्थानिय कलाकारका नृत्य तथा गाएन प्रस्तुत भए तर साहित्यले भने स्थान पाएन । साहित्य चाहिन्छ भनेर न त आयोजक संस्थाबाट सोध्ने कार्य भयो न त उप समितिबाट साहित्य चाहिन्छ वा हुनुपर्छ भन्ने रह्यो । नेपाल फेष्टिवलमा साहित्य वास्ता नहुदा खल्लो महसुस भएको चॉंहि पक्कै हो ।
कार्यक्रमको अन्त्यमा द भोइस अफ नेपाल टिमले दर्शक नचाएको थियो । पालैपालो अरिफ राउफ, किरण गजमेर, बर्षा इटनी, करण राइ र प्रमोद खरेलले गीत गाएर दर्शकहरु नचाउनु भएको थियो । बिशेषत किरण गजमेरले नेपाल र नेपालीका बारेमा बोल्दै गीत गाउदा दर्शकले मज्जाले साथि दिएका थिए भने प्रमोद खरेल आउदा ताली क्यार वाहवाही निक्कै चर्को थियो । गायक प्रमोद खरेलले दिल छ पोखरामा, यो कुरा गोप्य जस्ता चर्चित गीत गाइरहदा दर्शकहरु मज्जाले नाचेका थिए । साथमा थुप्रै बुवा आमाहरु पनि आाफनै पारामा नाचिरहनु भएको थियो । संगीत यस्तो चिज हो जसले के बृद्ध के यूवा के बाल बालिका कसैलाइ पनि छोड्दैन बस नचाइरहन्छ ।
कार्यक्रमको Main Sponsor Success Education and Visa Services रहेको थियो भने भने Platinium Sponsor ABM Homes रहेको थियो । Gold Partner का रुपमा The University of Canberra, Right and Associates Canberra-Education and Migration, 909IT Solutions, Expert Education and Visa Services, Illustrated Properties, Crown Institute of Higher Education and Grace international- Education and Migration Service रहेका थिए ।
