पश्चिम अष्ट्रेलियाको पर्थमा नेपाली एसोसिएसन अफ वेष्टर्न अष्ट्रेलिया (नावा) र गैर आवासीय नेपालीहरुको संगठन पश्चिम अष्ट्रेलिया परिषद (एन. आर. एन. ए. डब्ल्यु. ए.) को संयुक्त आयोजनामा बृहत खेलकूद कार्यक्रम (हार्मोनी कप) आयोजना हुन लागिरहेको छ। विभिन्न ८ खेलकूद बिधाहरु समावेश गरिने उक्त खेलकूद प्रतियोगिता फेब्रुअरी महिनाको अन्तिम हप्तादेखि शुरु भै मार्च महिनाको अन्तिम सप्ताहन्त सम्ममा सम्पन्न गर्ने र अप्रिल ३ तारिख आइतबारका विशेष गाला डिनर एव्ं पुरस्कार वितरण समारोहका साथ सम्पन्न गर्ने लक्ष्य राखेको छ।
क्रिकेट, फूटबल, ब्याड्मिन्टन, टेबल-टेनिस , टेनिस, भलिबल, चेस र ५ कि. मि. दौड सहित विभिन्न ८ खेल बिधाहरु समावेश गरिने उक्त प्रतियोगितामा भाग लिने खेलाडीहरुलाई $३५ दर्ता शुल्क तोकिएको छ; जस अनुसार ती खेलाडीहरुले ५ कि. मि. दौडका अलावा बढीमा दुई खेल बिधामा भाग लिन पाउने र खेल समापन समारोहमा आयोजना गरिने गाला-डिनर तथा पुरस्कार वितरण समारोहमा पनि सहभागी हुन पाउने व्यवस्था गरिएको छ। खेलाडी तथा टीम दर्ता यही आउने फेब्रुअरी महिनाको ६ तारिख आइतबारका दिनसम्म खुल्ला रहने छ।
हार्मोनी कप खेलकूद सम्पन्न गर्न नावा र एन. आर. एन. ए. डब्ल्यु. ए. का पदाधिकारी एवं बिभिन्न खेलकूदसंग आवद्द खेलाडी प्रतिनिधिहरु सम्मिलित हार्मोनी कप-२०२२ खेलकूद प्रतियोगिता आयोजना समिती गठन गरेको छ।
स्मरणीय रहोस्, एन. आर. एन. डब्ल्यु. ए. ले यस अघि हार्मोनी कप खेलकूदका दुई संस्करणहरु भव्यताका साथ सम्पन्न गरेका थिए।